【保險百科】同樣投資100萬，點解保費融資多50%回報？

好多朋友仔最近會好想了解多啲保費融資嘅方案，因為一來回報可以額外多50%，二來本身個產品就係保本，唔似玩孖展咁一吓唔好彩就要再攞錢補倉。究竟衣個槓桿式投資嘅概念係點？點樣先至做到呢？當中有咩風險呢？等小編今次先同大家上個新手班講解左個概念先啦！

 

首先，保費融資只會適用於一筆過比錢嘅儲蓄分紅保單，因為果啲計劃第一日嘅時候就已經有一定嘅現金價值，咁銀行先會基於個價值嘅一定比例去融資比投資者。就正如買樓嘅時候層樓就已經有個估值，銀行先會根據個估值嘅一定比例去融資比置業者。其他類似嘅概念仲有好多，例如股票融資、基金融資、期權融資等等，其實就姐係玩緊槓桿，所以睇嘅有3野樣：第1就係個抵押品有無價值；第2就係銀行接受果件抵押品嘅貸款價值比（Loan to Value；LTV）；第3當然都要睇埋自己應唔應付到個借貸風險，就好似按揭咁樣過左個壓力測試，大家先可以做到衣種槓桿。講返正題，分年期供嘅保單第一日係唔會見到任何現金價值，所以銀行借唔到錢比投資者，除非張單供完啦，咁就有現金價值去融資套現出來（假設達到最低貸款額），不過果種叫保單融資，而唔係保費融資。所以總括來講，保費融資係指我哋第1日以較輕鬆嘅一筆資金，去投資一份大額嘅保本儲蓄分紅保單。

 

以某上市保險公司嘅一份儲蓄分紅保單為例，整付保費為100萬港元，10年後就會增值到138.8萬港元。假設10年後就要退保終止個計劃，咁個回報效果係點呢？

 

自己比哂100萬港元嘅資本嘅話，個總回報率就好容易計算得到，公式如下：

• 投資本 = HK$1,000,000
• 總回報 = HK$1,388,000
• 總回報率 = 1,388,000 / 1,000,000 - 1 = 38.8%

 

保費融資嘅話，張保單第1日銀行係會融資72萬港元比投資者，自己只係出28萬港元嘅投資本作為保單首期。保單生效之後，投資者就要定期還錢比銀行。但要記住記住，筆貸款唔似按揭咁樣需要投資者喺規定年期逐步償還貸款本金，只係當投資者要決定退保果陣，先需要一次過償還貸款本金。換句話說，貸款就係還息唔還本，喺張保單生效期間，只係還72萬港元貸款嘅利息就可以，到保單10年後到138.8萬港元而退保，投資者先需要用部分還左72萬港元貸款就會有錢袋落袋。再總結一次，除左28萬港元嘅投資本，仲有10年間嘅利息還款係額外嘅投資支出（假設平均2%利息），而138.8萬港元扣除左72萬港元貸款先係10年後嘅現金收益，個總回報率公式如下：

• 投資本 = HK$280,000
• 保費貸款 = HK$720,000
• 利息成本 = 720,000 X 2% X 10 = HK$144,000
• 總回報 = 1,388,000 - 720,000 - 144,000 = HK$524,000
• 總回報率 = 524,000 / 280,000 - 1 = 87.1%

 

所以從上圖可見，保費融資嘅做法比無融資嘅多接近50%嘅總回報率，計返個內部回報率（Internal Rate of Return；IRR）就分別係5.58%同埋3.33%。回報率又多一截，資本又輕鬆一大截，唔知您又會點揀呢？

 

新手班就去到衣到啦！如果想優化自己嘅投資組合，保費融資係一個值得考慮嘅新元素。大部分香港人嘅資產只係集中喺物業，另外就只有相對少量嘅銀行存款、強積金、股票，資產組合就成個U形咁樣咁唔健康。其實一個健康嘅資產組合應該要係成一個鐘形，低同埋高風險資產要佔比較少，反而中風險嘅資產就要佔最多，所以配置一啲保本嘅資產係一個好好嘅選擇。

 

當然裡面涉及揀選嘅保險計劃同埋融資銀行，有質素嘅保險計劃可以為回報帶來信心，而有合適嘅融資銀行可以提供最優惠嘅借貸條件加強風險嘅抵抗力，所以搵個專家去幫大家揀就比較穩陣。不過，小編相信大家未必判斷到對方究竟係咪真係專家，話哂保費融資以前果幾十年喺私人銀行先做到，而私人銀行戶口至少要有100萬美元先開到，最近先將門檻降到零售銀行級別，小編想提醒一句對方未必有經驗。如果大家擔心自己嘅理財顧問只係理財專家，唔係保費融資專家，不妨來以下嘅講座聽吓先，了解左更深入層面嘅資料，到時先再因應自己嘅現金流水平同埋資產狀況再設計方案都未遲啦！